倆口子上哈京第五天の飲飲食食

第5日嘅飲食專題唔係太多題材

因為依日係由哈爾濱返落北京, 一大清早又趕頭趕命去搭起飛

食杯麵當早餐~~

lunch就係飛機上面嘅可愛lunch box

雖然我地係坐"頭等", 但係膳食完來都係一式一樣

不過俾我想像中, 已經係一個好好嘅供應喇!!

依個lunch box都幾古怪, 有4款食物:

雞蛋糕1個, 肉鬆甜麵包1個, 咸趣花生一包, 榨菜一包!!!

個雞蛋糕好好味, 肉鬆甜麵包就怪怪地, 因為麵包甜但係肉鬆咸...

而花生都係正正常常

但係.... 真係唔係好明點解會有包榨菜?!

唔通d人用黎夾麵包?! 但係都有肉鬆做餡啦~

而且, 龍少貪得意打開黎試... 嘩, 咸到抽筋!!!!

唔通俾d乘客做手信?????? 真係諗極都唔明!

 

到咗北京之後, 因為龍少同我響王府井d藥房買咗藥食

所以就要去食番d嘢, 如果唔係好易胃痛!

我地行吓行吓就去咗王府井大街裡面

裡面原來全部都係d小店食市, 不過裝修得好似古裝街咁~

我地周圍搵嘢食, 咦... 俾我見到有一間賣羊肉泡饃喎

以前睇電視見得多, 所以依家好想試吓~

於是先叫一碗, 等試過好味再叫

點知佢個泡饃都唔正宗嘅

人地果d係俾碗肉湯, 再俾塊饃你自己撕成小塊

再放入湯整淋黎食嘛.... 有d失望

加上d菌開始發作, 所以都冇咩胃口喇!!!

同龍少行完哂書城之後, 我地就返返酒店

返到酒店龍少就第一時間開咗依個炖木瓜要我食

因為佢話我乾咳好傷喎~~ 都真係幾好味架!

 

不過食完之後, 我就一直攤響張床度開始大昏迷

可憐龍少就自己去呧佢嘅favour~"永和大王"度食牛肉飯

佢仲外買咗我鐘意嘅小籠包同咸豆漿返酒店

等我醒咗都有嘢食....

可惜... 除咗龍少叫醒我起身食藥同幫我抹身之外 (因為已開始發燒)

我就一直昏迷到第2朝~~~

可憐龍少就自己一個食哂6隻小籠包+咸豆漿做宵夜喇....