曼谷天書

好開心好開心好開心好開心好開心~~

 終於都"tum"到龍少同我去行開吓, hea吓喇!! 辛苦咗成年, 就連返學都冇暑假放, 等到依家考完試, 而且又sem b又未開始, 我地就可以返返去龍少個鄉下~泰國"梳孚梳孚"! 今次去bkk好緊張, 一來成2年未返過去, 龍少d泰文又忘記得7788, 我又想去好多好多地方, 食好多好多好味泰菜同日菜, 都唔知點安排好! 不過今次最大目的, 就係龍少迫我去body check! 因為佢話我身體孱得緊要, 同埋都唔知係唔係為第日小龍鋪路~~ 不過點都好啦, check吓都冇壞嘅, 而且真係平過hk好多倍喎!! 

仲有, 我要做spa做shiseido facial, 剪頭髮, 泰式推油, 行"jap度jap", 睇泰拳.... 哈哈哈, 真係好似好忙咁, 就連我d朋友都話我地似去business trip多過去hea! 本來仲想去埋蘇梅or沙美or芭提雅, 因為好想出島瞓教

!!! 但係龍少就話算啦, 下次先去島. 唉呀, 都唔知點算, 咁多嘢想玩, 6日真係唔多夠喎~~ 龍少, 點算好?! 

^^^雖然我地已經有成6-7本泰國旅遊書, 但係龍少對依本真係愛不釋手, 坦白講, 正過沖哥果d!

後記: 其實一直想去多次布吉, 因為上次我地25號由布吉飛返曼谷, 26號就收到海嘯嘅消息, 若果我地當時多留一日, 真係唔知會發生咩事?! 仲有響果邊萍水相逢嘅朋友, 唔知依家變成點? 

平安夜, 迫人夜

24號平安夜過得很平安, 今年我地冇book去食buffet, 冇開party, 覺得今年太多唔好嘅事發生, 所以想靜靜地咁過. 而果日響屋企都有好節目, 就係我由朝到下晏都係睇住龍少表演~~~瞓教,

一睇就睇到成5點幾, 真係精彩得緊要! 之後我地先去食"傍晚下午茶"... 係唔係好好節目呢!!! 不過算啦, 佢平時返工咁辛苦! 之後我地就去咗老尖逛逛, , 周圍都好多多多多多人, 所以都係逛咗一陣就去食壽司, 係呀, 又係壽司! 但係點知間間都要等大約100張枱, 嘩! 點等呀, 唔通真係等到倒數咩! 所以我地就走咗去食北海道拉面喇~ 咁耐冇食, 但係水準都keep得住喎~ 希望今年過後所有事都順順利利啦~~~

蕉蕉muffin

依個係響我考試期間(係, 係考試中)突然好似冇哂mood同energy嘅時候整, 用黎慰藉一吓可憐嘅自己! 個muffin好好味, 不過d蕉蕉未夠熟, 所以冇預期中咁香, 但係都已經足以令我補充腦力~~  不過我今個考試期間好乖, 冇好似之前咁再亂咁食甜食喇

結婚週年

今年嘅結婚週年紀念, 有一個好好彩嘅timing! 因為唔似舊年咁要考試, 冇得慶祝. 而今年冇撞正考試之外, 仲可以抽一日時間可以唔駛溫書去玩, 哈哈哈, 真係開心!! 龍少就專登請一日假同我去海洋公園玩一日! 我地仲響之前一晚整定愛心便當去野餐呀... 因為我地唔想去到又係食M記, 所以整咗好多肉肉, 啱哂龍少啦! 到咗第二日, 一向鐘意賴床嘅龍少竟然好聽話, 乖乖咁起身! 果日真係好開心, 玩咗好多機動遊戲, 除咗龍少唔想玩嘅過山車同我唔敢玩嘅海盜船之外啦~~ 睇相啦~

後記: 玩完一日, 仲去咗食我鐘意嘅sushi之後, 返到屋企竟然有袋city super係房, 一打開, 原來係我好想好想好想要嘅豬豬暖水袋, 嘩, 好warm呀~~ 龍少話啱哂我依d經常手涷腳涷嘅人喇~~ 龍少, 多謝你份咁有心思嘅禮物!

***好cutie嘅豬豬

肥媽媽生日快樂

Merry Christmas!! 今日係聖誕節, 原來又係肥媽媽嘅舊曆生日, 所以尋晚平安夜, 我地都寧願早少少返屋企, 整番個blue berry muffin俾肥媽媽, "乙水"吓佢啦! 因為今年Xmas, 我冇買到佢最鐘意食聖誕乾果蛋糕! 因為佢老喇, 唔可以再食咁多甜食. 所以我依個蛋糕係減糖減蛋, 希望佢食得開心啦~~~

^^^嘩, 肥媽個肚臍

^^^杯杯muffin

^^^好正嘅感覺

又再掟死狗?!

繼之失敗咗嘅"掟死狗腸腸包"之後, 我又再接再厲... 今次真係好好好俾心機, 再有步驟都好仔細, 而且仲將個麵團搓咗成個鐘, 之後先再發酵. 今次仲發酵咗成3個鐘, 而我仲加咗吞那魚做餡料呀!!   不過唔知點解, 點搓都拉唔到薄膜?! 你地睇吓, 今次焗出黎個樣好好, 因為我終於都識得控制個焗爐, 而我自己試過, 都好次ok喎!

但係~ 到咗第二朝, 我pack咗2隻俾龍少做早餐, 點知.... 龍少話好硬, 雖然俾起上次好好多, 但係... 都係硬!!! 佢要再去買過其他早餐.........  嗚嗚嗚嗚嗚~~~ 點算好?!