上星期好番冇幾耐
點知唔知俾D咩人又傳染咗.....
尋日朝早睇完中醫之後
一面上堂一邊喪咳喪暈~
返到屋企之後仲發燒~
好彩都仲有小小精力去摷雪櫃
本來仲想煲花膠粥俾近排OT到九彩嘅龍少補吓
點知摷落先知冇哂花膠....
於是就煲咗煲唔知咩垃圾粥~
"蠔屎花菇江搖柱聖子乾蝦米咸鴨肫煲粥"
煲出黎又幾鮮幾好味喎
龍少返到黎仲食咗3大碗
真係GOOD喇!!
好喇... 苦茶就快煲好, 又要去差電喇~
2007年11月26日 星期一
2007年11月24日 星期六
2007年11月20日 星期二
熱辣辣
上星期惹到不知名病毒
被醫生証實為感冒菌
今次又入腸.... 又有排痾!
龍少, 唔關我事架, 我俾人惹架咋~~~
+++++++++++++++++++++++++++++++++++++++++++
其實我一向對薑都冇咩好感
薑餅唔食, 薑茶嫌辣唔飲, 子薑炒牛肉剩食牛肉
子薑皮蛋又係食哂D皮蛋, 豬腳薑我都只係食蛋
新年龍少媽媽整嘅蘿蔔糕有薑一啖都唔食~~
但係唔知點解, 我竟然超級鐘意薑汁撞奶
仲要係愈濃薑味愈好
依家秋高氣爽, 都係時候整番碗食吓先
由於係第一次整, 我磨咗成大半舊薑
奶係用維記高鈣低B奶, 再加小小糖
沖落去之後等咗成10分鐘
咦.... 得喎....
不過龍少嫌太辣~
"辣D好, 辣D驅風嘛"
所以.... 是晚不斷有交響樂奏鳴曲伴隨入睡....
2007年11月18日 星期日
懷緬ing@澳洲牛奶公司
哈哈哈, 我今次都用"隨意門"出街呀~
上星期同mini預祝之前
首先同咗隻大病菌靚圓圓出去行街街
我地2個傻人去到上海街, 簡直好似細佬仔去反嘔城一樣
有幾開心有幾癲, 係形容唔到架!
係揮霍前我地當然要醫醫肚補充體力啦~
原來靚圓圓同我有好多共同喜好
大家都鐘意去食又平又好味嘅野
我地都好認同有時... 貴唔=好食
反而平平地果d先至夠出色!
於是去咗佐敦嘅澳洲牛奶公司
由於中學同大學時代都係係佐敦出沒
而依間係我唯一夠膽幾個女仔去嘅茶餐廳~
所以依度都算得上留得多腳毛嘅其中一個地方
但係... 我地唔係叫佢全名
每次準備食lunch時, 總會問同學
"今日去唔去飲人奶?" 呵呵呵~~~
到大學果陣同d同學仔都係咁叫
搞到連d男仔都問我地去唔去人奶公司, 哈哈哈.....
佢地個餐真係好好味, 厚多士夠厚又鬆
我碟炒蛋好滑, 所以俾人叉咗2舊
通粉好味, 連叉燒都香d
雖然每次去食都係趕頭趕命
雖然d伙計成日都想收咗你隻碟
但係佢地都算好nice, 野食又唔差
其實佢地d奶茶真係好好飲
可惜近年愈黎愈唔受得, 所以冇飲
而龍少一定要有飯落肚
所以... 好耐都冇去過喇!
唔知下次又要等幾耐呢?
+++++++++++++++++++++++++++++++++++++++++++++++++++++
當晚返到屋企, 竟然有個驚喜
龍少又買咗jenny barkery俾我呀~
今次仲係大罐裝
龍少, 我減緊肥喎, 點食好呀?!
2007年11月17日 星期六
萬千星輝賀mini@北京樓
首先報告身體狀況:
其實我估依隻菌叫"百冇"
頭痛... 冇, 鼻水... 冇, 打黑痴... 冇, 胃口... 冇, 精神... 冇
依家只係頭... 繼續脹, 肚... 痛小咗
夠竟... 你想點???? 哼!
^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^
黎緊就係mini嘅大大大日子
所以我, 靚圓圓, 飛E, 笨B媽媽同秋香姐一聚美女預早同mini祝賀
祝你天下無雙, 幸褔摩天輪, ~~ 呵呵
最可惜就係vanlily有事出席唔到
我到依家都未食過餅神嘅蛋糕呀!
飯局依然同上次聚會一樣
都係笑到癲笑到爆, 最難得笨B媽媽都開始有被同化跡象
但係... 就係因為6個裡面有5個帶菌者
搞到我一返到屋企已經唔多妥.....
喂, 咁多位, 真係多謝哂喎~ 哼!
頭盤有海蜇頭
我地嘅共同目標: "片皮鴨", 同埋俾靚圓圓遮住咗個頭嘅松鼠黃魚
真係好咸嘅咸肉津白, 三鮮滑豆腐
仲好有味小籠包
之後仲有mini點嘅高力豆沙咸味香蕉, 同埋咩飛點唔知乜沙乜芋餅...
當晚真係嘈到不得了, 但係係開心果種!
飯後仲同靚圓圓一齊把臂同遊彌敦道
今次我冇蝕低, 幾帶都要番個軟綿綿big hug先~~
P.S. 個鴨殼.... 就係因為病
所以仍係雪房長眠ing
但係... 龍少已經暗中監視佢嘅一舉一動!
To: 笨B媽媽
係你講我先知原來鍚鍚都會有BB, 仲要係鼻哥隆出........ 呵呵呵
To: 咩飛
你個cool牙look真係夠照喎
同埋多謝你教曉我電話入嘅道理!
好鬼鐘意你索褔壽膏個look呀~
To: Mini
好開心有幸可以預早同你慶祝
祝你永遠開心快樂, 無憂無慮
如果你入開黎而我又煲咗湯, 上黎飲碗啦~
識都你同咩飛真係令我人生充滿色彩
不得了, 連後備電都用完
do do do.............
2007年11月14日 星期三
2007年11月10日 星期六
愛哭鬼
由細到大, 我都好容易喊
開心喊, 唔開心喊, 睇戲喊, 俾人鬧喊, 家家姐走喊, 朋友唔好喊.........
枉枉為咗小小事就會喊一大餐~
可能我較感性? 定係軟弱?
但係... 人愈大, 喊嘅頻率減小咗d
原因係, 龍少唔鐘意身邊嘅人喊
佢並唔係果d你一喊佢就心軟, 會呵你嘅人
佢係一個超級堅強嘅人
你喊, 佢只會覺得你更冇用
所以... 慢慢我由郁吓都喊
變成開始喊住知道喊係解決唔到問題
嘗試喊住咁去搵問題所在繼而去解決問題~
碰巧前幾日係經濟日報讀了鄭丹瑞一篇散文
很有意思
就同大家分響一部分吧~
我認為世上最真最真的反應, 就是BB的眼淚毫不造作, 也不矯情人愈大, 愈多機心, 哭愈刻意有時連哭泣都變成一種武器, 為了達到自己的一己慾求利用別人的同情心: 「怕咗你呀!」除了眼淚是真的之外, 其他一切都是假稍為長大之後, 明白眼淚的威力在爭取同情, 支持的時候就盡情去哭泣, 盡情去流淚直至大人心軟為止那種是已滲了雜質的眼淚, 不再純真, 也不再可愛回想起小時候經常喊可能以為喊就可以解決困難吧!但想起以前"郁吓就喊"的日子, 實在有點討厭後來不哭了, 想憑實力, 不再靠眼淚要哭, 就讓BB哭個飽吧!
你呢? 你上一次喊又係幾時?
又係為咗咩?
2007年11月8日 星期四
立冬ing
今朝起身整早餐俾龍少果陣
望到個天灰灰暗暗
仲有幾滴雨毛
心諗... 唔通又凍番?
好囉!!! 下星期可以著"砵"囉~
到晏d起身後, 心血來潮望吓個月曆
噢, 原來今日係立冬喇~
即係冬天真係黎喇
點算點算? 我仲未執櫃桶換季喎.....
上星期同肥媽媽慶生
因為唔想佢食太多蛋糕 (老人家血糖難控制)
所以就整佢都好鐘意嘅提子玉桂包包
焗嘅時間真係香到震
最好笑係... 肥媽媽話隔咗晚夜仲好食~ 呵呵
除外肥媽媽果份, 又點小得包痴陳生嘅小圓包~
一款加芝麻, 一款加oregano, 好味~
TO: 菇奶奶, Vanlily, 各路搓包高人
請問夜晚整好嘅包包
點樣可以保存到第2朝一樣鬆軟??
P.S.點解Yahoo! BLOG個版面成日都唔見咗自我介紹, 相薄, 留言box???
訂閱：
文章 (Atom)