有嘢食

近排, 唔知係唔係天氣凍咗, 定係之前發燒發到個人慶合合, 成日都好想好想食雪糕! 不過由於仲未好番哂, 再加上又啖多帶咳, 所以只係可以望圖解困啦~~ 其實, 我最想都係試吓山打跟個雪糕火煱, 嘩... 好似好正咁架, 不過冬天先有, 而且都幾貴, 再加上冇人陪我食, 文少唔特別鐘意食雪糕, 佢只係鐘意食好老土嘅雲喱嗱味... 不過前排d信用咭到期換禮物, 換咗"genki"紅衫魚"Q磅"之後, 仲可以換到張山打跟嘅紅衫魚"Q磅"!!! 嘩哈哈, 真係高興到呢..... 不過諗諗吓, 我一個人點食成條紅衫魚呀?! 本來都想話換月餅食架, 但係果盒唔知幾多星伴月, 屋企兩老又唔食得甜嘢, 咁又唔可以分到俾人, 咁叫我一個人梗死佢咩, 唯有等埋屁屁(大姨媽)返黎一齊去烚吓烚吓啦~~ 不過當然係, 我出條紅衫魚, 有剩佢包啦,唔係咩呀!

夜瞓

上兩個禮拜,天氣突然開始轉涼, 又落雨又吹西北風, 身邊嘅朋友(包括為食龍少爺)個個都中招, 只係我一個冇咩事..... 但係, 當佢地開始好番嘅時候, d"病芹"就開始走咗黎我度, 唔單係只大少d"芹", 仲要係周圍d同學學生果d都俾哂我!!! 所以我依家係"集天下之大成"於一身!! 所以病足一個禮拜都未好得番... 真係辛苦~ 最慘就係d藥鬼死咁眼瞓, 成日都wing吓wing吓咁, 仲連把聲都沙哂, 個鼻又塞哂, 幾sexy呀, 呵呵呵! 希望可以快d好番啦~

買咗喇.... 呵呵~

依個就係我買咗果隻cello喇.... 真係開心都震~~ 不過好彩冇我想像中咁貴, 都唔錯, 只係$1800咋.... 仲咩都包哂, 包生仔tim呀, 哈哈哈! 一買咗番屋企就一定玩吓先啦, 不過都係唔識玩, 一味係度劏雞!! 聽日就上堂喇, 希望聽日可以學多d啦.

講番教琴, 我最後都決定唔要煲軚仔兩兄弟. 因為一來時間夾唔到, 二來唔想再俾佢兩個個麻煩老豆嘈嘈閉, 再加上想搞吓d生意仔, 雖然只係初步idea, 但係spare多小小時間去搞搞佢好d囉! 再加上讀書d成績都唔係咁理想..... 最後一科出咗喇, 唉.... 得C-咋!!! 真係好唔開心, 好驚第日畢業得second lower honour又或者得個third honour咁就慘喇! 希望再努力努力努力, 揸油揸油揸油啦!

好想放假

經過咗一個密集式嘅summer term, 依家終於都過番小小人過嘅生活, 成個人都鬆哂咁!~ 好想好想去番d resort嘆番吓, 就好似之前我地過馬來西亞嘅一個小島~tioman, 中文叫刁曼島. 我地係由新加坡搭8個鐘頭車再加好似係2個鐘頭船先到! 不過依度唔似布吉, 佢冇downtown, 冇market, 其實係百冇! 不過我就係鍾意咁樣, 唔駛好似響布吉咁成日掛住行街買嘢食嘢! 係依度一日3餐都包哂, 仲要係好東南亞feel嘅好味buffet. 食完又可以join佢ｄ活動, diving, snorkeling, jungle cruise..... 真係好好玩~ 唔鍾意玩依d又可以瞓響泳池邊涼吓海風... 噢, 真係好想立即飛去! 本身想一係去"鬚梅", 一係去沙美島, 不過今次我想去沙巴多d, 因為果度個熱帶雨林仲勁, 又想去神山睇日出, 仲有佢棵全世界最大嘅Rafflesia... 唔去親身睇吓, 總係覺得d花同張相都係假! 所以....真係好想好想好想去是也！不過..... 揸lift人為食龍少爺話佢想去bangkok做 thai message多d喎..... 咁要多d祈禱先得喇!

搵工

依幾日都係咁搵工, 因為真係唔想再教琴~ 愈教愈down, 又冇mood, d學生又成日唔聽話, 都唔似得我地細個果陣咁尊師重道! 唉.... 不過都仲未有電話去interview, 希望快d有就好喇!

星期三開始學cello, 真係好開心, 因為由細細個開始恨到依家先有得學! 今日剛剛買咗琴書, 之後就係咁睇呀睇~ 雖然d內容對我黎講真係好簡單, 但係對於點樣揸弓點襟弦都唔識, 希望快d學好佢啦! 哈哈, 我聽日就去買琴喇, 雖然係有好多選擇, 但係我都係買隻cheap cheap地玩住先, 不過都要$2xxx架, 等遲d學得好d先買隻勁嘢, $3xxxx啦~加油加油

大家姐~ 好掛住你....

依張係我之前響台灣影架, 哈哈哈~~~

尋晚發夢, 夢見遠在花旗嘅大家姐返咗黎呀!!! 嘩, 真係開心到不得了! 我地一家人一齊去'滴住黎'玩, 就好似果陣屎我地響米國'滴住黎'玩咁!!!! 因為大家姐今次都走咗差不多8個多月喇, 佢響hk果陣, 我地成日一齊去行街街, 去唱k, 又黎同拖肥玩! 真係好開心架! 不過當佢一走咗, 我就又回復番沉悶嘅生活! 其實以前我地嘅感情都唔係太好, 成日都只係嘻嘻哈哈, 但係就一定唔會講心事! 但係自從大家姐走咗之後, 同埋我結婚佢特登提前返黎幫我, 仲個個禮拜一齊去買嘢整頭飾同怖置, 仲一齊上深圳, 真係好開心~~到咗依家, 我地嘅感情真係好過以前好多, 當然仲會講心事啦!! 屁屁, 唔須張買咩禮物獎勵我, 你要快d返黎同我地再一齊去玩呀~~ 好好好好好好好掛住你!!!

出咗result喇~~

我最鐘意嘅tenpura.....

今朝一早就要起身教琴, 真係好眼瞓, 所以一教完有個break, 就嗱嗱聲跳番上床再瞓過! 不過都唔瞓得耐, 小睡多一粒鐘又要趕起身. 因為晏晝又要踏上郊遊之路~~ 當然唔係真係郊遊啦, 我就想喇! 係要去烏溪沙教琴. 其實真係好遙遠, 要搭成個半鐘頭巴士先到, 仲要行多15分鐘!! 真係等於個個禮拜去行山咁, 不過心情當然唔到啦! 去完烏溪沙就跟住去馬鞍山. 我真係唔明依家d細路諗咩, 我地以前學咩都好, 老師要你點就點, 永遠唔敢say no, 不過得出黎個result當然好好. 但係依家d細路, 你叫佢去東佢就去西, 叫佢綀好d琴喇, 就快考試喇, 就好似叫佢去死咁! 問佢點解綀得唔好, 佢就話因為開學!!!!! 吹啤!! 真係唔知點教!

跟住夜晚自己返學, 個啊sir又戇吓戇吓咁. 又唔print "碌屎"我地, 叫我地自己上網print~ 但係大佬呀, 佢成6點都未upload上去, 真係唔駛做剩係坐響個腦前邊等你d屎咩, 正白痴! 又放得夜喎, 明明夠鐘落堂, 仲話要睇埋個video先喎! 嘩, 好彩個傻佬唔識搞部機咋, 佢一問有冇人識開, 個個都沖出去~~閃喇, 仲等你咩! 不過今日最開心都係知道咗a/c同econ個grade, a/c有B, econ都有B-, 不過最驚果科OB仲未出呢......

新學期

依隻Tiffany係我嘅dream wedding ring~~  不過為食龍少爺都送咗隻好似嘅俾我, 但係當然冇粉藍色小盒啦......

聽日就係新學期喇, 真係有d唔想返學! 因為放得果一個禮拜嘅所謂暑假, 之後又要日復日咁教琴返學教琴返學..... 都幾悶架!! 不過好彩好多時返學都好開心, 因為識到班都一樣傻傻嘅同學仔, 所以都可以補償番之前教琴嘅激心! 係呀~ 其實教琴真係好悶, 雖然佢有唯一一個好處, 就係唔駛交稅, 但係當你教著D唔聽教嘅學生, 上完九個字足足可以嘔番2筒血架, 而依D咁嘅學生, 我有4個, 即係一個星期要嘔8筒血, 真係唔係誇張! 其實真係唔想再教而去搵過另外一份工, 不過要供樓又要讀書, 都係讀完先算啦~