好喇, 收拾番個心情
唔好再俾d"不知所謂"嘅公司搞亂情緒!
一於番番去最美的北海道~
dAy 5 、晴、大風雪
係小樽我地只係留宿一晚
之後就過境旭川再到夢寐以求嘅~美瑛
一早起身先去逛逛小樽最出名嘅中央市場
同三角市場
沿途可見尋晚有幾大雪!
中央市場就係眼前
可惜太早嘅緣故, 好多鋪頭都未開!
之後轉戰三角市場, 其實我地嘅目標好簡單...
魚生飯~~~
市場內偷影~
但係... 因為天氣實在太凍喇... 所以魚生飯... 放棄咗... 嗚~~~
之後走咗去最喜歡的lotteria食番個熱騰騰早餐
我嘅滾滾pancake + 特濃暖笠笠粟米湯
龍少嘅豬柳半生熟旦包, 好warm好感動耶...!
當然仲有好趣口薯角, 當堂成身暖哂~~~
食飽飽之後番酒店攞行李起程去美瑛
點知又開始大風雪
小樽果然"旺雪"!
大概半個鐘就返到札幌，之後就轉特急火車去旭川
大約個半鐘就到旭川
由於中間有2個鐘, 龍少決定我地係火車站附近食午飯+逛逛
呵, 無心插柳之下竟然去咗食北海產遺產~旭川拉麵
原來北海道拉麵都已經有3大類
札幌拉麵係味噌湯
旭川拉麵係醬油湯
函館拉麵係塩湯
今次我地真係有機會試哂依3款拉麵, yeah~
你睇間拉麵店好似叮噹屋企咁, 好懷舊咁~
龍少依d屎硬派，去到邊都堅持只食佢嘅味噌湯~
我就要粟米醬油拉麵，粟米勁甜勁好味!
不過我依碗竟然仲貴過龍少果碗~
食飽飽就係旭川火車站周圍走
依2個木人係咩人呢? 唔知點解覺得佢地係夏威夷土人!
火車站小店好多野買呀, 不過因為聽日又會番旭川
所以... 又冇得買囉!
大約1點半, 起程到美瑛, yeah~
沿途已經好靚喇~
得一卡嘅鄉村小火車，你睇架火車似唔似"千與千尋"果架?
等咗半個鐘終於都到喇, 好緊張~
YEAH~~~ 美瑛, 我來也!!!
待續
