尋晚放咗學, 大廚龍少又未番, 而我又要趕report, 所以都冇打算入廚房半步! 但係做做吓, 突然間好想食曲奇, 咁冇奶油落惠康買藍罐頂住架, 依家食嘢奄尖咗!! 所以竟然掉低份report走咗入廚房, 整番上次超級失敗嘅鬆趣曲奇. 不過今次加咗雲呢嗱油, 小小橙酒同古古力粒. 今次攪粉果陣真係好小心, 同埋入爐時不斷搞個control制, 因為到依家都未之bake係代表上發熱線定下發熱線. 所以一路做powerpoint一路睇爐! 果短短半個鍾就響書房廚房扮"劉長", 作短距離賽跑~~~~ 搞到我隻小狗拖肥都跟我跑埋一份, 但係佢都唔知為咩! 皇天不負有心人, 登登登登, 終於出爐喇, 攤一陣立即整塊入口--- 趣, 超級咁趣!!!! 今次真係多謝大少奶教曉我焗鬆趣曲奇原來唔簡單!!!
2006年11月27日 星期一
成功在望
自從上次整咗d俾龍少話"掟死狗"腸仔包, 一直都好唔甘心, 因為自己好好好鍾意食腸仔包, 冇奶油連自己最鍾意嘅都整唔好掛?! 於是死心不識咁再整一次!!! 今次似樣好多喇, 不過都係硬咗d, 同埋唔係好明咩叫"起膜"? 大少奶, 幫吓我啦~~~
日日做到冇停手
每次去親旅行, 我都一定要買d嘢食返黎, 唔單只係送俾朋友做手信. 而係俾龍少同自己得閒響屋企無聊果陣食~~ 所以一到考試季節, 我就會肥肥肥肥肥..... 不過依家叻咗, 唔響屋企溫囉, 返學校library溫就唔會口痕啦~ 不過諗諗吓, 除外日本之外, 我同龍少鍾意去親嘅地方都係有肉乾賣?! 好似星+波嘅林志源, 泰國嘅林珍香(點解又係姓林? 屁屁, 咁你快d叫排骨開當賣肉乾啦啦隊!) 台灣嘅黑橋牌, 以至最近嘅澳門鉅記--- 不過, 自從上次睇到大少奶介紹, 原來G肉乾都可以自己做! 嘩, 仲得了, 一於起飛奔落超市買材料... ... ... 嘩, 當一焗好果吓香到呢, 真係勁好味, 龍少都好鍾意, 因為我加咗好多好多泰國買嘅辣椒粉, 哈, 簡直有噴火嘅感覺!!!!
2006年11月26日 星期日
麵+屎
話說上星期龍少同我去咗黑痴島10蚊店掃貨
因為貪佢咩都係10蚊雞, 最啱買嘢成日都唔睇價錢嘅我~
大家千祈唔好誤我二小姐咁豪, 買咩都唔理價錢
查實係唔記得睇至真!
所以好多時都好"魚皮"
例如去it睇中件褸好靚, 又試過哂就話要買
好彩次次龍少都一定睇吓個價錢牌, 就提吓我啦!
有次真係嚇死, 差d要咗件$5xxx嘅普通到唔普通嘅秋褸!!!!!
雖然大多數人都唔會俾老公知佢換季換咗幾多錢
但係就係我依個死穴, 次次買衫都一定要同龍少去先得~~
講番黑痴島10蚊店
我最鍾意買佢嘅麵屎醬, 因為佢嘅味道同sogo賣$5x嘅一樣
我買嘅係原味, 1pack有12包, 真係好抵!
所以我好鍾意晏晝自己煮通粉加埋個麵屎湯底..... 真係好正架~~
2006年11月25日 星期六
黑猛猛~~
好耐冇upload 新嘢上黎, 因為上星期因為一時懶朵, 落雨唔帶遮, 點知就係咁樣病咗喇, 搞到好多嘢影哂相但係又冇精神post~~ 響屋企瞓瞓瞓!!! 星期六肥龍話同我去街街, 如果我未好返就唔去! 咁咪即係迫我去睇E生囉~ 因為一來屋企付近全部都係黃綠, 想一劑見效就要出舟車勞動番出面睇; 而且我唔係太鍾意睇醫生, 食咗佢地D藥就成日好似啪咗丸仔咁, 溫溫炖炖~~ 不過為咗去街, 冇計啦~~
* * * * * * * * * * * * * * * * * * * * * * * * * * * * * * * * * * * * * * * * * * * * * * * * * * * * * * * * * * * * * * *
今日係我個書友仔絲+麗生日, 所以響星期一已經焗咗一堆特特特濃古古力rock cake送俾佢! 其實唔知佢鍾唔鍾意, 之不過佢鍾意食古古力, 同我係一樣嘅古力大聯盟~ 不過人地食極唔肥, 我一食就肥到亞媽都唔認得, 所以都係.... 少食少食~~
特特特濃古古力rock cake
材料:
低筋麵粉 130g
梳打粉 1/4 tp
發粉 1tp
鹽 1/4tp
糖 70g
雞蛋 1隻
牛油 50g (溶液)
牛奶 110-130ml
可可粉 30g
黑古古力 50g(若怕太濃可減)
* * * * * * * * * * * * * * * * * * * * * * * * * * * * * * * * * * * * * * * * * * * * * * * * * * * * * * * * * * * * * * *
今日係我個書友仔絲+麗生日, 所以響星期一已經焗咗一堆特特特濃古古力rock cake送俾佢! 其實唔知佢鍾唔鍾意, 之不過佢鍾意食古古力, 同我係一樣嘅古力大聯盟~ 不過人地食極唔肥, 我一食就肥到亞媽都唔認得, 所以都係.... 少食少食~~
特特特濃古古力rock cake
材料:
低筋麵粉 130g
梳打粉 1/4 tp
發粉 1tp
鹽 1/4tp
糖 70g
雞蛋 1隻
牛油 50g (溶液)
牛奶 110-130ml
可可粉 30g
黑古古力 50g(若怕太濃可減)
做法
- 焗爐預熱190度
- 牛油煮溶, 倒入古古力伴溶
- 所有粉篩好, 加入糖, 鹽, 旦, 牛奶一同伴勻
- 加入 古古力溶液, 慢慢伴勻至幻滑
- 放入焗爐焗18-20分鐘, 視付火力而定
2006年11月12日 星期日
腸腸包
今日一早上完堂, 但係又未夠鐘出街, 就諗吓點打發餘下嘅時間喇~ 睇吓望吓, 突然'叮'一聲... 諗到! 之前都已經買咗高筋粉同酵母菌, 所以就一於整麵包~ 不過由於係第一次整, 都有d驚驚地
一開始就搓d麵粉同其他材料, 嘩, 搓到好鬼核突~ 跟住就攞去發酵. 原來發酵係會令到舊麵團發大, 好得意, 之後等呀等呀, 等到夠鐘, 先發現原來屋企冇餡料, 得番一條香腸, 真係可憐! 但係又懶, 唔想落街買, 所以就cheap cheap地張就一次咁多, 一條香腸開四囉, 真失禮!!!
不過好彩焗緊果陣都好香, 個製成品都尚算ok, 入得口, 但係就QQ咗D, 唔似人地果d咁鬆軟, 唔知係唔係俾少咗水, 定係發酵得唔夠時間呢?! 不過希望下次會整得好d啦
^^^我係一舊人見人愛嘅發酵麵團
^^^你睇似唔似個口咬住條腸
^^^入爐喇
^^^開始成型
^^^我醜但我很溫柔
護膚DIY
之前響書展買咗本台灣嘅'牛爾的愛美書', 一直都有睇, 仲好想試佢裡面介紹果d DIY嘅面膜啦, 潔膚啦, 面霜等等, 但係一直都唔知邊度有得賣.
不過依家終於都搵到邊度有得賣果D化工原料喇, 等我聽日去買哂D原材料返黎大搞特搞先!!
2006年11月11日 星期六
生日蘿蔔糕 (已+食譜)
前日放假無所事事, 突然諗起之前問龍少想食咩生日蛋糕, 佢就話想食"蘿蔔糕"!!!
依個人就真係傳統得緊要. 不過既然佢想食得咁緊要, 好! 就的起心肝學吓整啦~~
起初以為磨蘿蔔好easy, 但係點知原來好好好辛苦架, 磨到我要搬埋張椅入去坐響到磨... 最終搞到成隻手都麻痺哂, 抬都抬唔起!
好彩係磨蘿蔔之前一早切定哂d腊味, 原來腊腸同腊肉好硬好難切, 特別係d腊肉, 又肥淋淋又核突. 所以我就將全部肥嘢切鬼哂, 哈哈哈... 所以得番好少肉!
跟住我做咗一輪巫婆, 搞咗一鍋白潺潺嘅嘢之後, 就同佢地做steam咗成個鐘, 終於, 醜婦終於出場喇. 雖然就真係醜咗d, 但係經龍少試過味之後~~~~ 哈哈哈, 連龍少都讚好!!!
龍少, 生日快樂呀~~
材料:
白蘿蔔3斤
冬菇3隻
瑤柱 20g
臘肉 150g
蝦米 20g
臘腸 1-2 條
粘米粉 400g
清水 3 杯
荵(切粒) 1 條
調味料:
鹽1湯匙
糖2湯匙
胡椒粉少許
生粉4安士
做法 :
1) 冬菇、蝦米用熱水浸透,瑤柱浸軟撕成幼妯絲,再將冬菇蝦米切成幼粒 。
2) 蘿蔔去皮洗淨,刨絲或切絲。
3) 臘味用熱水洗淨,切粒。蘿蔔去皮洗淨,刨絲或切絲。
4) 起鑊下油爆香各種臘味材料,下調味兜勻炒透,盛起。
5) 蘿蔔刨絲,原鑊用清水兩杯及鹽、糖同煮約五分鐘,盛起。
6) 蘿蔔絲隔開水份,趁熱將粘米粉倒入蘿蔔中,並將煮過蘿蔔的水慢慢倒入蘿蔔內,注意份量適可而止。
7) 拌入所有材料及調味料,趁熱攪成稠狀。
8) 糕盆塗油,倒入蘿蔔漿料,以大火蒸一小時即成。
6) 蘿蔔絲隔開水份,趁熱將粘米粉倒入蘿蔔中,並將煮過蘿蔔的水慢慢倒入蘿蔔內,注意份量適可而止。
7) 拌入所有材料及調味料,趁熱攪成稠狀。
8) 糕盆塗油,倒入蘿蔔漿料,以大火蒸一小時即成。
將蘿蔔刨絲時
, 最好將一半蘿蔔刨粗絲, 一半蘿蔔刨幼絲, 因為幼絲會響蒸時溶化! 有粗絲蒸好出黎口感會更好!!2006年11月7日 星期二
小時候
今日已經係星期二, 到龍少去玩完嘅第二日, 但係心情都仲係未能平伏得到
因為龍少朝朝都神咁早就起身返工, 而我好有幸地可以到晏晝先起身開工
所以當我起身嘅時候已經唔見咗佢, 所以成日都有好失落感. 再加上之前個weekend去咗玩
對足48小時, 今次真係......................
>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>
話說小時候 已經好鐘意食蛋糕 不過都係限於清蛋糕
因為咪咪吉唔鐘意食忌廉, 覺得d人食到一口到係忌廉係一件好恐怖嘅事!!!
所以我好鐘意食紙包蛋糕, 一來有蛋嘅香味, 而且又鬆又軟, 再加上冇忌廉, 認真perfect~
之後又再響大少奶到揾到如何自製紙包蛋糕, 嘩, 真係不得了啦, 仲唔嗱嗱聲去整咩?~
嘩.... 真係香噴噴喇
2006年11月4日 星期六
龍少 生日快樂!
今日係我最親愛嘅龍少爺生日 以前佢一向最鐘意食楊支金露蛋糕 但係因為醫生話佢唔可以食芒果 而佢又唔鐘意食cream 所以今年我就焗咗個簡簡單單嘅心型檸檬蛋糕 好彩個蛋糕又香又軟熟 佢好鐘意呀~~ 心情好返小小...
龍少: 生日快樂 希望你工作順順利利 開開心心 無論環境點變 每年生日我地都可以一齊過
2006年11月2日 星期四
好味東瀛朱屎蛋糕
由於尋日嘅唔脆曲奇+同龍少嘅對話 實在對我有莫大嘅沖擊 所以放咗學夜猛猛都走去整個個龍少小有會食嘅日式cheese cake 經過一輪磅磅 搞搞 再焗焗 終於都出爐喇
今次個樣都ok 有d一粒粒響面係因為搞cream cheese嘅時候俾佢呃咗 搞嘅時候好滑好滑 但撈好哂之後 倒出黎先知有d芝士粒粒痴咗響底未溶 激死我~~ 不過好彩今次龍少爺話好味 仲話同'E滕家'差唔多 嘩 真係開心 不過諗深一層 係唔係佢安慰我呢?!
2006年11月1日 星期三
唉... 失敗之作
其實我自己好鐘意整嘢食 但係就只係鐘意整餅同西餐 對於中菜嘅油煙 我就真係怕怕~ 而且龍少爺係入廚高手 同埋只鐘意食中菜 仲要係最老土果d 好似干炒牛河, 揚洲炒飯咁. 佢成日都叫我去學 但係我真係好鬼驚d油彈到周圍都係, 仲要彈到手, 好痛架~~ 而且我煮親佢都好似唔係好滿意咁 就開始對中菜有d嫌棄 仲唔係咁想去試 咁既然龍少嘅手藝咁高超 所以我就退落黎 是但整d佢唔係好識嘅蛋糕同餅仔穩陣d!!
於是難得尋日放假 一心就諗住做吓亞茂整吓餅 因為好耐都冇整過 而之前買落果一大袋麵粉同cream cheese 所以就'的'起心肝去搞搞震. 上網見到'大少奶'依個cookie好似好易做, 所以就嗱嗱聲準備好所有材料就開工.
焗咗15分鐘 死喇 點解個底燶燶地? 一時間都唔知點算?! 唯有照攞出黎攤涷啦~ 睇咗一陣 覺得個樣都唔錯啦 於是就食咗一塊 結論係: 唔甜 冇香味 得小小脆 好大陣麵粉味~~~~~ 唉 點解會咁架?! 諗黎諗去都唔知邊度出錯 到夜晚俾龍少試食 噢 佢話 你都唔好食喇 掉咗佢啦 我都唔知講咩好喇 >>>
訂閱:
文章 (Atom)