令人懷念車輪轉~~

細細個嘅時候, 每次同肥媽媽去買餸, 都例排一定會有一袋麵包返屋企!

我地陳氏一家四口都好包如命!! 不過我地各有各喜好, 陳生由始至終都係硬豬仔同長法包; 肥媽媽最鐘意食奶油包+提子包+車輪包+蝴蝶酥... 所有甜包; 我自己最鐘意食腸仔包+方包d皮+長法包; 至於提子太太, 雖然佢都好鐘意食包, 但係... 係唔係蝴蝶酥, 都唔知係唔係佢鐘意呢?! 

當時由於肥媽媽開始想減肥, 所以只買車輪包食,

連起初唔鐘意車輪包嘅提子太太同我, 都開始迷上依條外形古怪嘅包! 不過我地會"挑"走哂d提子乾, 哈哈, 因為我地又要食又要玩囉, 而且我又會食哂硬硬嘅麵包皮~ 跟住就會俾肥媽媽鬧鬼!!! 所以, 依個係一個令人想起兒時嘅開心時光!!

<奇華車輪包~$9一大條>

糖漿吉士Puff~

尋日本來約咗個之前食飯個舊同學, 去佢屋企探佢就快一歲嘅BB

, 講起就真係失禮! 自從人地有咗好似6-7個月果陣, 到依家都未見過~ 就連BB出世都夾唔啱時間去探佢地.... 一等就等到依家! 鬼咩, 我地依d返學嘅, 一咗過Semester A就會一直忙都直至年尾, 點解? 因為Sem B一開始就接住Summer再接Sem A, 途中一個Sem break都冇..... 所以先會想同龍少農曆年再去一轉玩, 之後就要收心讀書直到畢業!!!! 各位友好, 依家清楚哂喇, 唔好再怪我唔出黎gathering喇~~~ 等.... 等多一年啦~~

帶咩去俾人做手信呢~ 因為唔想買西餅or禮盒咁"娘"? 之前出去已經整咗古古力曲奇俾佢地, 而且依排天氣乾燥, 整蛋糕會好乾爭爭, 所以今今次特別d, 整puff~~~

星期五晚嘅時候開始整個內涵, 即係個puff! 整嘅過程都幾好玩, 唔係太難! 不過當要"唧"出黎果陣就真係麻煩咗d, 因為我冇"唧袋", 所以.... 咪用住密實袋代替先囉! 之前整其他都冇咩問題, 但係依個麵團就真係... 有d杰, 所以, 好難先唧到~ 下次再整都係要買番個"唧袋"好d....

到咗第2日, 上完哂堂之後, 就開始整個外皮同個餡料! 個外皮我用焦糖淋面, 所以好脆, 而個餡料就係吉士餡, 不過我冇用椰奶, 因為我最憎嘛, 所以我改用鮮奶, 出黎個效果都係一樣啫!

嘩, 好好味呀~ 因為依家天氣冷, 個puff好鬆而個外皮糖漿好趣.... 好開心第一次就成功! keep好一盒俾同學, 一盒俾肥媽媽, 自己就留番幾粒, 因為龍少都唔係太好! 點知突然接到個佢電話, 由於某d原因, 去唔到同學屋企, 所以唯有響街交收盒puff啦~~ 之後再番肥媽媽屋企食飯, 當佢食一件之後, 哈哈~ 肥媽媽話好好味, 仲好似響街果d咁... 真係好開心呀~~~ 

<好靚嘅吉士puff>

<近鏡好金黃呀~~>

生? 定唔生?!

尋晚去咗兩個飯局, 都係大談生仔經!

但係就各有見解:

中學同學表明現時絕對冇意慾生BB, 因為實在太多嘢想做太多地方想去, 若果生咗BB, 就一定要乖乖留響屋企湊B! 即使可以請"姐姐", 但係一來唔放心, 二來"姐姐"都要放假啦~~ 所以.... 唔好搞佢! 其實某程度上我都好認同佢, 因為生BB真係一個好大嘅責任, 我自己就真係冇咩信心可以教佢成為一個好人

(我唔奢望我將來個BB會點點點.... 只想佢係一個好人!!! 哈, 或者自己跟本上係一個壞人啦, 所以好驚~) 而且我都仲有好多地方想去但未去, 好似去NY探提子太太, 帶龍少去LV大開眼界, 本來去honeymoon但當時timing唔啱而未去嘅希臘, 好想好想去睇北極光, 去大堡礁睇魚, 去沙巴登神山, 去羅馬+梵蒂岡朝聖.... 嘩, 真係多到10隻手指+腳指都數唔哂, 你話, 點取捨得到~~

不過當去到另一個飯局, 由於有一位產前+一位產後嘅媽咪級響度! 佢地就當然不斷叫你快D生啦~~ 因為佢地都好enjoy大住個肚嘅感覺, 同埋依家可以同BB玩嘅時候!

搞到自己都有d心郁郁, 話哂個BB都係自己同龍少共同擁有嘅一個生命! 但係當講到孕婦健康同臨盆問題, 佢地就講咗好多好恐怖嘅事例~ 例如: 有咗3個月前嘔到工都返唔到, 日日要響屋企瞓; 好容易會有孕婦糖尿病, 到時要打針入肚; 都知道自然生會好痛, 開刀之後傷口仲痛 (不過我都係prefer開刀), 不過佢地話陣痛比開刀個傷口仲痛多好幾萬陪.... 真係聽到我膽戰心驚, 仲恐怖過恐怖片!!!

但係, 問題就黎喇~~~ 就係龍少好似好想要BB.... 不過我都一早表明咗, 今年一定唔可以要住, 係都留番出年畢業之後先算~ 因為唔想大住個肚返學咁肉酸. 自己友就知我結咗婚啫, 萬一俾其他同學仔唱我未婚媽媽就真係水洗都洗唔清!! 不過聽完朋友D經驗, 真係好想打退堂股喇~~~ 龍少, 我我我....... 唔想生得唔得呀~~~ 

送禮佳品

由於前年開始從返校園嘅關係, 都有成年多過住d平淡但緊張嘅日子!

因為每個星期有五晚都要返學, 星期六日又俾D lecturer攞咗黎quiz同交project. 所以真係小咗同朋友相聚, 小咗放工同龍少行街街拍吓拖! 終於到咗今日, 由於cello嘅初班暫時告一段落, 要到3月先開班, 所以有一晚可以鬆一鬆! d朋友都好犀利, 好似知道個cello會停咁, 所以今晚就有2個飯局! 一個係結咗婚之後都未見過嘅中學好friend嘅同學, 另一班就係大學同學. 我仲好開心, 因為其中一個大學同學可能帶埋佢9個月嘅BB出黎, 而另一個大學同學響NZ返黎, 仲有咗BB, 真係好開心! 咁耐冇見, 今日就做咗D手信俾佢地, 由於上次嘅古古力碎曲奇大家拍爛手掌之後, 今日我再下一成, 整咗濃味古古力曲奇!! 今次都好好好脆, 仲好香呀~~~真係開心到飛起!!

亞sa: 肥肥冇事嘛, 我地都好耐冇見喇!!!

＜好味古古力曲奇＞

古古力曲奇

好耐好耐冇入廚房整餅, 到尋晚終於都忍唔住開雪櫃, 摷番舊牛油出黎放軟. 不過等咗好耐好耐, 舊牛油都仲未放軟.

於是唔理咁多, 牛油硬硬地都開始整喇! 今次比平時做嘅時候俾多咗rum酒同心機, 一路整個心一路諗住大少奶 ~ 話要輕手咁翻d粉團... 同埋我今次特登將d曲奇整得細細粒, 好易食! 焗咗18分鐘左右, 終於都出爐喇, 真係好興奮!! 其實每次整完餅之後, 係到等出爐果吓, 係最最最期待嘅一刻!!! 所以之前整得幾辛苦, 當睇到d蛋糕麵包係咁升高嘅感覺, 真係好開心! 

今次好好成功呀! 又鬆又脆, 就算隔咗一晚夜都脆都不得了, 哈哈, 又有返學前嘅小食喇~

<古古力好大粒>

<好味呀~~>

久違了的最愛.....蕃茄麵包

好耐之前都已經好鐘意食Delifrance嘅長法包配三文魚醬, 因為佢個長法包好好好脆, 個三文魚醬又香又唔會好似淨食三文魚咁齋! 所以到返大學時代嘅lunch, 如果唔係canteen或者去唱k, 我地就一定去Delifrance!!!

畢業後, 每次行行經過Delifrance, 都一定會入去兜番個圈, 因為龍少唔鐘意食乾爭爭嘅嘢, 所以我都係入去望梅止渴一番! 不過有一日, 行去佢地bakery果邊, 發覺有我最最最...鐘意嘅蕃茄做成嘅方包! 因為我本身係一個蕃茄狂! 每次見到話有"蕃茄"成份嘅嘢食, 我都唔會放過! 蕃茄薯片蕃茄棒棒蕃茄餅乾......都無一幸免! 所以龍少響煮麵煲粥even打邊爐, 都一定落大量蕃茄!!!! 

依隻蕃茄方包真係好好好蕃茄, 未食齋聞都聞到~ 當你撕開個麵包心, 仲會發現有蕃茄核!!

好真架, 而且個方包皮又焗得濃濃, 好好味!! 不過好似前幾年開始, 佢地就唔係間間分店都有得賣, 因為話唔係太多人鐘意, 銷路唔係咁好!!!! 我都揾咗好耐都揾唔到邊間分店有供應. 直至星期日, 我響旺角mtr等龍少果陣, 又貪得意走入去慣怔咁望吓, 點知真係俾我望到~~~ 真係開心到痺!! 即時買番一包先, 不過佢好似加咗價, 以前應該係6蚊4塊, 但係依家要成8蚊4 塊! 不過冇計, 終於知到咩叫千金難買心頭好!!! 

<哈哈, 食咗兩塊先記得影相! 不過依兩塊唔捨得食囉>

 

準備ing

好緊張好緊張好緊張, 其實由plan去ha er bin果日開始, 緊張指數都一直未回落返去適當水平! 因為真係好好耐未試過去d冰天雪地嘅地方~ 對上一次去凍屎嘅地方, 都係3年前嘅農曆年, 我地一家人一齊去北京玩(又係北京!!). 果次真係好凍, 特別係去長城果日, 應該係得零下15度, 凍到陳生陳太都唔上去做吓好漢就返歸休息

, 龍少就用冷帽笠頭包住眼耳口鼻, 提子太太就唔識字, 我就痴咗係咁笑唔停, 食哂D西北風入肚!!!! 

今次依個旅程就得番我地倆個傻人, 陳生陳太因為今年流年要向西北, 唔理我地~ 至於提子太太... 心到人唔到囉

!!! 而我地今次會由搭飛雞去北京, stay一晚, 第2晚就搭火車上ha er bin, 來回總供要瞓兩晚火車! 所以都好緊張, 唔知乾唔乾淨? d人又話ha er bin真係好凍, 依家1月都平均係零下1x/20度, 到咗2月仲凍, 大概零下2x度~~ 嘩, 真係凍過北京好好好多倍喎.... 

所以, 以我依d咁"蛇qwa"嘅人, 依家開始就要狩獵一d防寒用品! 星期日果日出咗去旺角d爬山用品鋪度睇d防寒內衣, 不過實在太多選擇, 龍少話要攞資料返屋企慢慢研究一吓先! 其實之前我地去韓國果陣都買咗一set天朁衣+褲, 但係就覺得唔係好掂囉, 依家間嘢都消失埋喇! 而我就唔理咁多, 響屋企摷番哂d防寒用品屾黎, 一於響屋企玩吓試吓先~~~

<依個係響長城外爭贏提子太太嘅星星ear mug - R10)

<真係好靚靚>

<依對就係舊年去東京, 係上野附近買好抵的真皮毛緾手套 - 1000YEN>

<裡面全部都係好舒服軟綿綿嘅毛毛>