曼谷漫遊記 - 第四集

第四日, 我地一早起身, 換好哂斯斯文文嘅衫, 食完早餐, 就出發返返去醫院攞body check個report! (因為去大皇宮係唔可以露出馬腳同手肶, 如果唔係唔俾入架, 我地去到果陣就有個鬼婆為咗依個原因響度同食蕉鬧交)等咗一陣間就到我喇! 成份report, 除咗我自己對個咗體重唔係好滿意之外,

其他一切都好正常! 就連屁屁擔心嘅地中海貧血都冇, 大家唔駛咁擔心我喇~~ 之後我地就去搭船, 去我地今日嘅目的地-大皇宮喇! 我地就搭橙色果條線, 響受吓清涼嘅海風同浪漫一吓!! 大約20分鐘度, 我地就響N8果度落船. 因為我地想去逛一逛臥佛寺, 當我地落咗船, 龍少就嗌哂肚餓, 於是我地就響附近食魚旦粉, 係, 又係魚旦粉!! 賣粉個亞伯好搞笑, 問我地係唔係日本人, 我地話係香港人, 佢就開始同我地講國語.... 不斷講, 又話佢d河粉好味, 當我地叫咗2碗, 佢又問我地好唔好食! 食完之後仲介紹d景點俾我地, 又教我地行去大皇宮! 雖然佢個樣好cool吓, 但係就對我地好nice, 又唔似壞人, 真得意!!!

當日成條街上面嘅人, 有一大半都係著黃色衫!

唔知係唔係係泰皇滿月呢! 本來好想影低咁壯觀嘅場面, 但係d人就好似"哈爾移動城堡"咁, 好快就移走咗, 所以次次都唔成功!!

龍少字典: 好多香港人叫呢條'昭拍耶河'叫"湄南河", 但係其實響泰文入面, 音"湄南" = 河流.

而"湄南河"正確解釋係"河流河"... 所以係錯嘅, 正確名稱應該係'昭拍耶河', 或只叫'湄南'就ok喇!!! 

<介紹沿途景觀>

<好靚嘅木船>

<舢舨>

<鄭皇廟>

<大排檔好cool亞伯>

<隨街可見超好味鮮榨冰凍青橙汁 - 30babt>

<超辣辣粉>

<唔知點解有叉燒嘅魚旦粉 - 30babt>

<沿途一帶>

當我地去到大皇宮果陣, 發覺佢個入場費加咗價. 對我依d孤寒人黎講, 200babt都已經幾貴架喇, 但係依家加到250babt, 仲衰就係佢地d本地人係唔駛錢入場!!! 真係唔知入唔入去好. 不過龍少話唔黎都黎咗, 而且外邊睇都已經好靚, 就入去見識吓囉! 咁既然老板都話say yes, 我冇奶由say no架, 所以就買飛入場喇! 一入到去, 果然係值回票價, 整個皇宮都係金碧輝煌, 真係會打唔開隻眼! 每一個建築都好仔細好精美, 每個角度都十足十postcard一樣, 真係不枉此行~~ 

<大皇宮入口>

<依張係我最鐘意之一>

行完大皇宮之後, 我地就搭番船去"又話拉", 即係唐人街!

我地依響行吓逛吓, 去咗林珍香買手信(其實俾自己嘅多d), 都冇食嘢就走喇. 因為我地要留肚, 留番去Grande Hyatt Erawan食dinner buffet嘛...  本來我係plan咗由"又話拉"搭的士去chit lum, 因為都係一條直路啫! 但係介於我地今次唔搭的士嘅mission, 所以我地就一路行吓睇吓咁, 行行吓就去到中央火車站, 而個mrt station就響隔離!! 真係好開心, 因為可以唔駛搭的士而去到"又話拉", 龍少話佢今日真係好有滿足感~~~

<又話拉一角>

<好懷舊嘅招牌>

<經常出現嘅情景> 

<無間道@曼谷中央火車站>