曼谷漫遊記 - 第一集乙

第一日嘅下晝, 當我做完body check, 返咗酒店之後, 就攤抖咗一陣. 本來龍少一瞓落床, 冇番10個8個鐘都唔會起身! 不過因為我之前要禁食, 即係由零晨12點到下晝3點幾都冇嘢落肚! 嘩, 對我依d大食怪黎講就真係想死啦

~ 好彩龍少都明白我有幾咁肚餓(佢之所以唔肚餓, 因為之前響白龍王度食咗早餐, 同埋響醫院對住一個禁食嘅人食咗個big mac), 所以就嗱嗱聲沖個涼, 換過哂d衫, 我地就向chit lum出發!

我地去到chit lum, 就去咗super rich度唱錢先. 嘩, 依間嘢個外表就真係成間黑店咁! 如果唔係thailand fans介紹, 我諗我地都唔敢去! 不過個rate真係好過外邊, 依度係4.62, 但係外邊就得4.5!!! 唱完錢, 我地就去咗水門區, 食出名嘅粉紅色人妖姐姐雞飯!! 不過唔知點解叫人妖姐姐呢? 依班亞嬋都唔係好似人妖喎?! 不過佢地d雞飯就真係一流!! 平時當我食到d好味嘅嘢時, 問吓龍少嘅意見, 佢都一定係"ok啦"! 但係依度嘅雞飯, 竟然可以令佢講一聲"好味", 可想言之真係幾好味呢!!! 其實佢d雞都係一般, 不過好滑同冇骨, 但係d雞飯真係絕, 香到冇人有! 同埋佢果d醬汁, 又辣又好味... d湯仲好味, 哈哈, 好味到好似落咗好多味精咁~~~ 我地2個人叫咗半隻雞, 3個飯(當然龍少佔2碗啦), 送咗2碗湯. 嘩~ 一陣風之後, 咩都唔見哂!!!

<依班女人都唔似人妖啫>

<一定要飲嘅ice tea - 2baht>

<好味醬汁 + 唔知有冇味精嘅雞湯 - free>

<半隻雞 - 200babt + 1碗超細油飯 - 5babt>

食完之後, 我地就去咗big c買小小雜糧, 因為龍少十分沉迷泰國出品嘅---米粉, 所以我地就去買定1,2款返酒店試味, 到最後一日先一次過大掃場!! 買完米粉, 我地就想去agent送嘅古法按摩度鬆鬆筋! 但係點知果間咁嘅嘢, 已經響條小路入面, 我地再行入去睇睇啦~~ 嘩, 不得了!

間嘢要由一個停車場落去... 龍少同我講, 依d咁嘅地方, 真係同拍"生化壽屍"d場景一模一樣架!! 我地倆個當然嗱嗱聲掉頭走啦, 快到連相都唔記得影!! 

因為俾果間嘢嚇親之後, 龍少要做古法按摩嘅決心更大! 於是我地都係返返去sala daseng, 去相熟嘅body tune度做番一個鐘! 做完之後真係爽爽, 成身鬆哂!

但係先發現原來已經成10點幾, 我地就去咗天書介紹果間bugs & bee度食"冬陰公海鮮焗飯", 同埋芒果沙冰(不過唔記得影相). 依個焗飯, 真係辣死我, 但係又好好味喎! 又辣又想食, 連龍少依d辣椒送飯嘅人都話辣呀~~~

<超辣冬陰公海鮮焗飯 - 95babt>

5 Jan 07