好喇~ 終於都可以開始寫我地 "倆口子上哈京"喇~~

不過由於每日都有大量行程同埋開餐地方

所以我會分開觀光同食飯黎寫

咁就可以集中d啦~

                                                                                          

2月19號年初二嘅大清早, 龍少就叫醒我起身準備收拾行李準備出發

點解龍少依隻懶訓王都叫到我起身? 因為.... 佢成晚都冇瞓囉~

平時出門我地都未試過咁早

因為我地多數都預到好小時間先去機場check-in

好似今次9:10am機, 通常我地都會差不多8:30先到~~

但係由於新年關係, 我地驚機場多人check-in

所以未到8點就到咗機場.... 真係乖!

今次我地搭港龍機, 時間有多d選擇, 但係就貴貴貴過中國國際同南方好多

9:10am準時起飛

大約12點半, 我地就已經到咗北京首都機場

由於去親國內地方, 都會見到好多解放軍....

所以都唔敢立亂影相, 一陣話我洩露國家機密咪大劑!!!

我地響上機之前收埋哂d羽絨入行李袋, 剩係著咗fleece係身

所以一出機場就要嗱嗱聲著番件羽絨~~ 不過都冇我想像中咁凍!!

龍少果然係北京地膽, 佢好熟路咁帶咗我去咗搭機場巴士去北京站

諗住出咗市區先打的去木棉花酒店

沿途風景都好靚, 因為我好鐘意d禿哂頭嘅樹, 好靚呀~~

     

車程大概30分鐘, 我地就到咗北京站, 諗住去戳的士啦

咦? 原來依個車站就係北京火車站

仲令到本來想返到酒店再出黎買火車飛嘅我地喜出望外

於是相都唔影就雞咁腳衝入去售票處

嘩... 一入到個售票處真係感受到國內地大脈搏, 連個售票處都有8個藍球場咁大

排咗一陣隊<其實都唔知係唔係排緊隊>, 終於都買到20號由北京去哈爾濱嘅車票

不過佢地只係剩番軟卧嘅上層

冇計啦~ 上層都要照要啦~ 跟住叫佢俾埋回程23號返北京車票啦

佢話佢個counter冇得賣喎!~ 仲叫我地去一號窗買...

去到一號窗, 左穿右插之下埋到counter度問啦

點知....

佢話回程23號返北京車票冇哂~~ 仲話最快有位都要26號~

咁點算???????

去程車飛都買咗喇, 退票又要扣20%手續費......

於是龍少再不斷周旋響各個counter之中: 問長問短

得出嘅結果係... 哈爾濱火車站果邊應該仲有回程飛, 依家只係北京full咗啫!

咁... 龍少話都冇辦法, 唯有返咗酒店先算啦~~~

跟住倆口子就完全冇心情地去揾的士

點知有司機因為近而唔願去, 仲點我地叫我地行去.....

但係行咗成20分鐘都係行得一個街口, 龍少又怕我凍

所以就再戳的士去酒店

嘩, 原來果條粉腸司機話近, 架車都行咗成15分鐘先到~~

跟住終於都有番d好事發生,

就係簡咗stay響木棉花酒店

(詳細情形請click -->我愛木棉花)

返到酒店, 龍少話不如打過去哈爾濱間酒店度問可唔可以代訂回程火車票

記得之前個朋友都係咁樣訂火車票

於是收拾好行李換過件衫之後

我地就出去醫肚, 再順便去揾電話card

嘩, 原來北京一d都唔似上海

搵便利店買電話card仲難過搵公廁方便~~~

搵便利店途中, 見到有間好靚嘅教堂

於是咪又順便影吓, 再睇下本旅遊書先知原來依間就係 "天主教東教堂"

都幾grand幾靚架~

  

   

唔知d國內同胞係唔係個個都覺得自己天生麗質

成日都好鐘意趁你影相嘅時候走入鏡

唔信? 之後大把証據呀~~~
終於幾經波折, 我地響d報販度買到電話card
一於嗱嗱聲打過去哈爾濱間酒店啦, 點知佢地4點40就收工唔聽電話
咁今晚唯有放鬆心情, 聽朝一早再打去問問啦~~

之後我地去咗王府井大街逛逛

周圍都係香港發展商起嘅mall, 唔怪得佢地d人成日都以為個個香港人都好有錢啦~

   
   

過多幾個月北京都有apm喇~

而東來順就好似7仔咁, 真係梗有一間係咗近!!!