倆口子上哈京第二天の飲飲食食

第二日嘅朝早, 等龍少打電話去哈爾濱之際

我就響張床度碌黎碌去, 因為個心好不安

到決定去哈爾濱之後, 就好似鬆咗一口氣咁

於是就嗱嗱聲就開始收搭行李, check out之後, 就一齊出去食早餐

首先我地去咗響"餛飩候"隔離果間"餃子大王"

因為尋日去食"餛飩候"嘅時候, 見到"餃子大王"都一樣咁多人

所以今日就一於要試吓

我地叫咗1兩羊肉大蔥水餃同牛肉芹菜水餃

原來佢地d水餃係即包, 所以我地都等咗好耐

等咗成15分鐘, 終於都黎喇~~

嘩, 好好味呀~ 加埋我最鐘意嘅陳醋, 簡直一絕

不過原來當地人食餃子, 係會加埋d生蒜一齊食...

嘩, 咪喇~ 我怕個口臭一個星期都唔清呀!!

之後, 因為龍少食唔飽

所以我地去咗龍少響上海公幹時最鐘意幫襯嘅"永和大王"喇! (點解間間都叫咩咩大王嘅?)

龍少叫咗一個典型嘅上海早餐~~粢飯+豆漿

仲食得津津有味, 而我呢.... 都係痴2啖就算囉~~

等龍少食飽飽, 我地就出發去故宮博物院

我地逗留響故宮差不多3個幾鐘, 就要去食飯

龍少就話不如去西單啦, 有好多嘢食架

咁我一定話好啦, 因為我都唔知咩單打咩單....

但係一去到, 覺得果度就好似旺角咁, 人多車多塵又多

本來我地都想慢慢搵吓邊度有好味而唔係食餃子嘅食店(龍少開始抗議)

但係行吓行吓, 睇吓隻錶... 嘩, 成3點喇

我地搭5點班火車, 最遲4點半要到火車站

而我地又要返去木棉花攞行李

於是就走咗入一個類似旺角中心咁嘅商場揾食

終於, 龍少決定去依間大家都唔記得叫咩名嘅日本麵...

個環境都ok, 不過d麵就~~~

好似上海麵囉!!

<龍少嘅: 差燒豬骨拉麵>

<我嘅: miso拉麵>

食完之後我地就嗱嗱聲去打的返酒店再去火車站

由於龍少話餐卡果d嘢食又貴又難食

同埋佢地響車箱賣嘅飯盒又樣衰到爆

所以龍少就好委屈咁...... 食咗個杯麵做晚餐

而我, 就係咁食零食囉~~

不過, 佢一邊食就不斷重複咁話"到咗哈爾濱一定要食好d......."

哈哈哈, 龍少果然係一隻食肉獸~~~

(第二天完)