2007年12月26日
龍少同我一早check-out
向嘉義縣嘅阿里山出發
高鐵俾一般台鐵靚好多, 快好多&貴好多....
我地搭10:06am班車, 因為要係中途站嘉義落車
如果直去左營(高雄), 10:00am果班仲不停站架~
架車好似新幹線!
車箱好舒服好靚, 瞓吓醒吓
大概個半鐘就到嘉義站
如何搭台鐵, 最快果列車都要3個半鐘.....
高鐵車站好靚好modern
我地一到埗就打電話俾聯絡人
個男人叫我地係車站等司機黎接我地去台鐵車站
因為搭車都要15分鐘....!
但係等呀等呀... 等咗差不多20分鐘都唔見人
龍少又走開咗周圍影相
我都唔知點算好, 不斷係度行黎行去
搞到詢問處個姐姐不禁問我要去邊
佢就話冇奶油咁晏都唔黎接我地
因為上阿里山嘅小火山搭正點半就開
一日只得一班....
咁我就俾個聯絡人電話佢幫我問清楚
今次係個女人聽, 佢竟然叫我地自己打的去嘉義台鐵站(!)
吓????? 個姐姐仲叫我地買定野食, 因為果邊冇咩食...
唉... 唯有嗱嗱聲買個mos burger就衝去打的
好彩, 真係15分鐘就到火車站
當時真係一肚氣, 於是搵個負責人黎出吓氣啦
點知d台灣女人真係好溫柔
仲解釋番原來之前果個男人係幾日前已經俾人炒咗
所以.... 玩我地囉(!)
好彩我地依d人福大命大, 永遠都大步攬過咋
就好似上次差d滯留哈爾濱咁好彩, touchwood!
當個聯絡太太同我地confirm哂所有哂之後
龍少仲有時間去買番個飯盒食
之後就帶我地去搭小火車囉
其實上阿里山仲可以搭旅遊巴
時間仲短d舒服d
但係選擇阿里山森林鐵路係因為:
1) 佢係世界聞名三條登山鐵路之一
2) 由海拔30公尺爬至2216公尺
3) 以"阿里山對碰壁"之"Z"字型運轉方式上山
4) 鐵路與森林, 雲海, 日出, 晚霞並為阿里山五奇
所以, 點都要搭吓啦!
中途有登山人仕上山
不過衣著認真騎呢...
坐咗成3個鐘又多彎又掉頭嘅車程
終於都到阿里山站喇
真係好凍好凍, 果陣4點幾已經得番10度!
本來仲以為阿里山好落後好鬼魅
但係, 原來已經開發得好好
影完相已經有酒店人員係車站等我地
坐咗5分鐘車已經到酒店, 個天仲已經黑哂
好快咁攞咗房再上去睇
俾想像中OK得多, 好乾淨好整齊
起碼唔似怪...... 談......
不過~~~ 當時得果10度, 但係間房竟然冇暖氣
又得果一張薄被.... 點算!
於是落counter問吓啦, 佢地話果張係唔知咩竹炭被
好暖架喎... 唉, 唯有瞓覺果陣凍先算啦!
如果唔夠衫, 仲可以租衫著架~
咦? 熱水到夜晚10點?
本來習慣夜食飯嘅龍少
雖然果陣6點多都立即拉我出去食飯
食完周圍行吓影吓相
但係因為好凍好凍
又有毛毛雨, 龍少唔肯帶單眼仔出黎...
所以, 影得好少夜晚朦朦朧朧嘅阿里山囉!
係阿里山, d霧話黎就黎, 話走就走
真係有d似... 猛鬼街~
註: 當晚瞓覺果陣, 張被真係好暖喎
真係... 估佢唔到!
沒有留言:
張貼留言